Son araşdırmalara görə, bitki yağları və zülallarla zəngin aşağı karbohidratlı pəhrizlərin uzun müddətdə daha az çəki artımına səbəb olduğu müəyyən olunub. Milli.Az axşam.az-a istinadən xəbər verir ki, bitki zülalları və yağları ilə birlikdə bütün taxılların istehlakı, uzun müddətdə çəki artımını azaltmağa kömək edir.

Amerika Birləşmiş Ştatlarının (ABŞ) Harvard Universitetinin tədqiqatçıları bildirirlər ki, bu tip aşağı karbohidratlı pəhrizlər, ət və nişastalı qidalardan ibarət pəhrizlərə nisbətən çəkinin uzun müddət saxlanılmasında daha faydalıdır.

Tədqiqatçılar qeyd edirlər ki, aşağı karbohidratlı pəhrizlər qısa müddətdə müsbət çəki dəyişiklikləri ilə əlaqələndirilsə də, uzunmüddətli təsirləri az öyrənilib. Araşdırmada beş fərqli aşağı karbohidratlı pəhriz növü, o cümlədən heyvan mənşəli zülallar və yağlarla zəngin pəhrizlər və bitki zülalları və yağlarla zəngin pəhrizlər araşdırılıb.

Nəticələr göstərib ki, aşağı karbohidratlı pəhrizin keyfiyyəti uzunmüddətli çəki dəyişikliyinin idarə olunmasında vacib rol oynayır. Tərkibində tam taxıl və digər bitki mənşəli qidalardan yüksək keyfiyyətli protein, yağ və karbohidratlar olan pəhrizlər daha az çəki artımına səbəb olur.